World Tamil Blog Aggregator Thendral: 2017

Wednesday, 21 June 2017

தமிழர் உரிமை மாநாடு

எது நமது நாகரீகம் ?

இரண்டாயிரம் ஆண்டுகளுக்கு முற்பட்ட சிந்து சமவெளி நாகரீகமா ?
மூவாயிரம் ஆண்டுகளுக்கு முற்பட்ட "கீழடி "நாகரீகமா ?

என் மாணவிகளிடம்நான்  அடிக்கடி விவாதிக்கும் கருப்பொருள் ...

 புதுக்கோட்டை 'திடல் 'இலக்கியக்கூடல் இன்று ,புதுக்கோட்டை மாவட்ட  த.மு.எ.க.ச.  "தமிழர் உரிமை மாநாடு" கூட்டத்தை மாலை  தமிழ்நாடு அறிவியல் இயக்கக்கூடத்தில் நடத்தியது .

மாவட்டச்செயலாளர் தோழர் மதியழகன் அவர்கள் ஒருங்கிணைக்க ,மாவட்டப்பொருளாளர்  தோழர்  ஸ்டாலின் அவர்கள் வரவேற்க  ,புதுக்கோட்டை மாவட்ட த.மு.எ.க.ச. தலைவர் தோழர் இரமா ராமநாதன்அவர்கள்  தலைமை ஏற்க ,,மாநிலசெயற்குழு உறுப்பினர் கவிஞர் முத்துநிலவன்  அவர்கள்
முன்னிலையில்,  மாநிலத்துணைச் செயலாளர் கவிஞர்  நீலா அவர்கள் பாடலுடன் துவங்க  ,சிறப்பு விருந்தினராக,   த.மு.எ.க.ச.வின் மாநிலப் பொதுச் செயலாளரும் ,சாகித்ய அகாதமி விருதாளரும் ,தமிழர் வரலாற்றை உலகுக்கு வெளிக்கொணர தொடர்ந்து போராடிக்கொண்டிருக்கும் தோழர் சு.வெங்கடேசன் அவர்கள் கலந்து கொண்டு உரையாற்றினார் .எழுத்தாளரும் விமர்சகருமான கவிஞர் ராசி பன்னீர் செல்வம் நன்றி கூறினார் .  

Tuesday, 6 June 2017

நாளை

நாளை
 மிரண்டு மருளும் கண்களுடன்
 பூக்கள் சேர்ந்து சோலையாகும் ....
 மௌனம் கலைத்து
 பூக்களை ரசிக்கும் ...

அமைதி ஆரவாரமாகும்
 சலசலவென ஆர்ப்பரிக்கும்

 விழிவிரிய பூக்கள்
விழியால்  கேட்க
 வரம் கொடுக்கும் ..
 அள்ளித்தழுவும்
 அன்பால் வசிகரிக்கும்
 கோபத்தில் உர்ரென்று
 கடைக்கண் காட்டும்
 அழுதழுத கண்கள்
 நான் உன் அம்மாடா என்கையில்
 என்விரல் கோர்க்கத்துடிக்கும் .
 சேட்டைகளை ரசிக்கும் ஆவலுடன் ....
விடியலுக்காக ...

Saturday, 29 April 2017

மனதை நிறைத்த காட்சி..

மனதை நிறைத்த காட்சி ..

புதுகை -தஞ்சை நெடுஞ்சாலை அமைக்கப்பட்டு பயன்பாட்டில் உள்ளது...

,கருத்து நீண்டிருந்த தார்ச்சாலையின் இருபக்கங்களிலும் மரப்போத்துகள் பாதுகாப்பாக நடப்பட்டுள்ளதைக் கண்ட போது..மனம் நிறைவாக இருந்தது ....இதுவரை நான் பயணித்துள்ள சாலைகளிலெல்லாம் மரங்களின் மரண ஓசையோடும்,மனம் நிறைய வேதனையோடும் வெறுமை சூழ ...கண்ட நிலையை மறக்கச்செய்தது புதுகை -தஞ்சை பயணச்சாலை ....

இன்னும் சில வருடங்களில் அவை நெடுமரங்களாக வளர்ந்து பசுமைப்பாதையாக நிழல்தரும் என்பதில் மாற்றுக்கருத்து இல்லை.இதற்கு காரணமான நல்ல உள்ளங்களுக்கு மனம் நிறைந்த வாழ்த்துகள்..

இதை ஏன் மற்ற சாலைகளில் பயன் படுத்த கூடாது ..?
சுங்க வரி வசூலிக்கும் நிறுவனங்கள் தான் அழித்த மரங்களுக்கு பதிலாக மரங்களை நட்டு வளர்க்க வேண்டும் என்று யார் உத்தரவிட வேண்டும் ...?

மரங்களுக்காக குரல் எழுப்ப வேண்டியது நம் கடமை அல்லவா?

அருகில் அமர்ந்து இருந்த அம்மா பேருந்தில் இரண்டு டிக்கெட் எடுத்தார் ..ஒருவர் மட்டும் தானே இருக்கின்றார் என்று இன்னொருவர் எங்கே அம்மா ?என்றேன் ...பின்னாடி என்மவ உட்கார்ந்துருக்காம்மான்னு சொன்னார். அப்படியா என்ன பண்றாங்க? ..வல்லம் கல்லூரியில் படிக்கிறாங்கம்மா..என்றார் .இங்கு தான் இடமிருக்கே ஏன் தனியா உட்காருந்துருக்காங்க?


நான் வெள்ளரிக்காய் கூடையோட இப்படி புடவைக்கட்டிக்கிட்டு இருக்கேன்ல அதனால எங்கூட உட்கார வெட்கப்பட்டுக்கிட்டு அங்கன போய் உட்கார்ந்துருக்காமான்னு பாவம் படிக்கிற புள்ளைக்கு சங்கடமா இருக்கும்ல அதான்னு சொன்ன போது...

இப்படிப்பட்ட அம்மாக்களால் தான் உலகம் உய்கிறது ..என்று தோன்றியது ..நாசமா போன கல்வி அம்மாவையும் அவமானப்பொருளாக்கியக் கொடுமை... ..

Monday, 24 April 2017

என் கதை


இரை தேடும் மலைப்பாம்பென
மெல்ல ஊர்ந்தது ..

வயிற்றுக்குள் சலனமுறும்
இரை போதாமல் ..

வழியெங்கும் இரை விழுங்கி
மறுபடி உயிருடனே இரையை
துப்பிச்செல்கிறது ...

இரவு பகலை விழுங்கி செரிக்கும்
அக்கணத்தில், கமலாதாசின்
"என்கதை "
என்னை செரித்துக்கொண்டது ...

தமிழ் தெரியாது ..


எனது இருக்கை இது ...கொஞ்சம் நகர்ந்து அமருங்களேன் ...இல்ல... ஒரு ஆண் இங்க உக்கார்ந்திருந்தாரு ..அவருகிட்ட கேட்டுட்டு தான் இங்க உக்கார்ந்திருக்கேன்னு வாதம் செய்யவும் எரிச்சலாகி இங்க பாருங்கன்னு மின்னஞ்சல் ஐ காட்டியதும் விழித்த பெண் மறுபடி எழாமல் பிடிவாதம் செய்ய ..

இல்லம்மா நான் முன்பதிவு செய்துள்ளே ன்னு...நிரூபித்தபின் ...அப்படின்னா அந்த ஆள் இங்க இருந்தரேன்னு தயங்க...அருகில் இருந்த பெண் அவர் தவறா உக்கார்ந்திருந்தார் அடுத்த கம்பார்ட்மென்ட் ..அவருக்கு ..என்ற பின்னும் , சற்றும் நகராமல் ...இருக்க மெல்ல எரிச்சலுடன் அமர்ந்தேன் ...

அந்த பெண்ணின் அம்மாவின் இடத்தில் வேறு ஒரு வடநாட்டு பெண் அமர்ந்து இருந்ததால், அவர் அந்த பெண்ணை எழுந்திருக்க சொல்ல சட்டாம்பிள்ளை கணக்கா அது கியா கியான்னு இந்தியில் ஏன் இடம் இதுன்னு வாதம் செய்ய ...இதுகிட்ட பேச முடியாதுன்னு அவர்கள் சோர்ந்த நிலையில் உங்க இடம் என்றால் நீங்க தானே உட்காரனும் எழுந்திருக்க சொல்லுங்க என்றேன்...இல்லம்மா இந்தி தெரியாது அதுகிட்ட தமிழ்ல புரிய வைக்க முடியல என்றார்கள் ..

அப்பதான் இரயிலின் முகப்பில் இந்தியிலும் ஆங்கிலத்திலும் மட்டும் பெயர் எழுதியிருப்பதைப்பார்த்து எரிச்சலுடன் ஏறி அமர்ந்த வெறுப்பில் ..அந்த வடநாட்டு பெண்ணின் அடாவடித்தனம் .....மேலும் கோபத்தைத் தூண்ட ...உங்க இடம் இது உரிமையுடேன் விரட்டுங்கள் என எல்லோரும் சேர்ந்து சத்தமிட்ட உடன் அந்த பெண்ணை அழைத்து வந்த ஆள் ...இருங்க ஏன் சத்தம் போடுறிங்க அவங்களுக்கு தமிழ் தெரியாது ...நீங்க சொன்னா எப்படி புரியும்னு சொன்ன போது.தமிழ் தெரியலன்னு அவங்க தான் வருத்தப்படனும் ..தமிழின் இடத்தில், தமிழனின் உட்கார்ந்தால் இப்படிதான் விரட்டுவோம்னு சொன்ன போது.கொஞ்சம் குரல் ஏன் உயர்ந்ததுன்னு தெரியல .

Tuesday, 11 April 2017

கக்கூஸ்

கக்கூஸ்-ஆவணப்படம் திரையிடல்

நாள் :15.4.17

இடம் :கந்தர்வன் அரங்கம்

8,அய்யனார்புரம் மூன்றாம் வீதி
புதுக்கோட்டை

குழந்தையின் மலத்தை தாய் கூட சற்று முகம் சுழித்தே அள்ளுவாள் ...

ஆனால் தினமும் ஆயிரக்கணக்கான மனிதர்களின் நரகலை தனது கைகளால் அள்ளி சுத்தம் செய்பவர்களை எண்ணி பார்க்க நமக்கு எங்கே நேரம் இருக்கின்றது ..

எண்ணிப்பார்க்க கூட தகுதியற்றவர்களாக வாழ்பவர்கள். நமது கழிவுகளைச் சுத்தம் செய்பவர்களை கடவுளுக்கு சமமாக வைத்து பார்க்க வேண்டுமல்லவா ...வராக அவதாரத்தை அவர்களுக்கு முக்கியத்துவம்...கொடுக்கவே எடுத்தாரோ உண்மையாக இருந்தால் ...கடவுள்

Monday, 10 April 2017

போர்க்குரல் ஒலிக்கின்றது ..

போர்க்குரல் ஒலிக்கின்றது ..

தெருவில் இறங்கி வருமுன் காக்க போர்க்குரல்
எழுப்புகின்றனர் ..குழந்தைகளும் ,பெண்களும் ...அவர்களோடு சில ஆண்கள் மட்டும் ...

மதுக்கடைகளை குடியிருப்பு பகுதியில் திறக்காதே
என்று ...?

எல்லாவற்றிற்கும் கூடும் ஆண்கள் கூட்டம் இதற்கு மட்டும் ஒதுங்குவது ஏன்?

கடையைத் திறந்தால் அடித்து நொறுக்குவோம் என்று அந்தப்பெண் கூறுவது உங்கள் குடும்பத்திற்காகவும் தான் ...

அதிகமான விபத்துகளும்,,அதிகமாக பென்குழந்தைகள் முதல் மூதாட்டிவரை பாலியல் வன்கொடுமையால் பாதிக்கப்படுவதற்கும்  காரணமாக இருப்பது மதுதான் என்பது அனைவரும் அறிந்த உண்மையல்லவா ?

மதுக்கடை வருமானத்தில் மக்களின் உயிரைப்பறித்து இலவசங்கள் கொடுக்க நினைக்கும் அரசா மக்களைக்காக்கும் ...?

நம்மை நாமே தான் காத்துக்கொள்ள வேண்டும்..

நெடுஞ்சாலை மதுக்கடைகள் குடியிருப்புகளில் நுழைவது இன்னும் மோசமான நிலையே உண்டாக்கும் ......

மக்கள் நினைத்தால் மட்டுமே முதலாளித்துவ,சுயநல அரசை ஒழிக்க முடியும் ...

அன்று குழந்தை திருமணத்தால் பெண்குழந்தைகள் லட்சக்கணக்கில் விதவைகளாக இருந்தனர் என்பது வரலாறு ..
 
இன்று மதுவால் பெண்கள் லட்சக்கணக்கில் விதவைகளாக ஆக்கப்படுகின்றனர் என்பது மறுக்க முடியாத உண்மை

பெண்களுக்கு துணை நில்லுங்கள் ..அவர்கள் உங்கள்
சகோதரிகள் தான் ....

Friday, 7 April 2017

ஆணும் பெண்ணும் சமமா ?


 
ஆணும் பெண்ணும் சமமா ?

ஒன்பதாம் வகுப்பு மாணவி இன்று என்னிடம் வந்து மிக ரகசியமாக அம்மா ஒருத்தன் என் பின்னாடியே வந்து அவனை காதலிக்கச்சொல்லி கட்டாயப்படுத்துகின்றான் ...இல்லைனா விசம் குடிச்சி நீதான் காரணம்னு சொல்லிட்டு செத்து போய்டுவேன் ...உன் பள்ளியில் உன்னை அவமானப்படுத்துவேன்னு மிரட்டுகின்றான்மா. அப்பா அம்மா கிட்ட சொன்னேன் அவங்க அவன் ரவுடி நீ தான் கவனமா போனும்னு பயப்படுறாங்கம்மா...

என்னம்மா செய்வதுன்னு கலங்கியபடி கேட்ட பொழுது..மனம் வெடிக்கும் நிலை..ஒரு பெண் குழந்தை எதெற்கெல்லாம் போராடி வளர வேண்டியுள்ளது ..

துணிச்சலா இருடா இதற்கெல்லாம் பயப்படக் கூடாதுன்னு தைரியம் கொடுத்தாலும் ..இனி உன் அப்பா கூடவே வந்துட்டு போண்ணு தான் சொல்ல முடிந்தது ...

அதையும் மீறி தொல்லை செய்தால் காவல் துறையில் சொல்லிடுவோம்னு சொல்லி அனுப்பினாலும் மனதில் ஒரு அச்சம் படுபாவி ஆசிட்டை ஊத்திடுவனோன்னு..
 
தனக்கு தானே குழி தோண்டும் மாணவிகள் ....

ஆண்பிள்ளைகள் மட்டும் குறை கூறினால் உண்மையை மறைப்பதாக ...ஆகும் ..

இன்று பெண் குழந்தைகள் பெற்றோர்களைப்படுத்தும் பாடு..சொல்லி மாளாது...

பருவத்தின் வாயில் நின்று அவர்கள் இக்காலக்கட்டத்தில் மனதை வழிப்படுத்தும் முறையை கூறினாலும் புறந்தள்ளி வீழவே துணியும் நிலை.

பெண்குழந்தைகள் படும் பாடுகளை தினமும் அறிவுறுத்தி நீங்கள் தான் உங்களுக்கு முதல் பாதுகாப்பு ...எதையும் மறைக்காமல் பெற்றோரிடம் கூறுங்கள் ...என்று எவ்வளவு முறை சொன்னாலும் விழலுக்கு இறைத்த நீராக ஆகின்றது ...

திரைப்பட கதாநாயகிகள் போல் காதல் மட்டுமே வாழ்க்கை எண்ணி வலையில் வீழ்கின்றனர் ..

முன்பெல்லாம் சில மாணவிகள் மட்டுமே இப்படி இருப்பார்கள்..ஆனால் இன்று அதற்கு எதிராக பல மாணவிகள் விட்டில் பூச்சிகளாக ...

பெண்ணை பெற்ற பெற்றோர்கள் அவர்களை வழி நடத்த முடியாமல் இரத்த கண்ணீர் வடிக்கின்றனர் ...

பல பெண்களை சுற்றும் ஒருவன் எனத்தெரிந்தும் அவன் தான் வேண்டும் என முட்டாள் தனமாக கூறும் மாணவிகளின் வாழ்க்கை என்ன ஆவது .....

திரைப்படங்கள் ரவுடிகளின் பின்னே அலைய வைத்து வருங்கால சந்ததிகளை வீணாக்கியது தான்  மிச்சம் ..

Tuesday, 28 March 2017

வீதி கலை இலக்கியக்களம்-37

                            வீதி கலை இலக்கியக்களம்
                                கூட்டம்-37

இன்று புதுகை ஆக்ஸ்போர்டு சமையற்கலைக்கல்லூரியில் வீதி கலை இலக்கியக்களத்தின் 37 ஆவது கூட்டம் மிகச்சிறப்பாக நடந்தது.

நிகழ்விற்கு முன்னதாக கவிஞர் அன்னக்கொடி அவர்கள் வீதியைப்பற்றி எழுதிய கடிதத்தினை கவிஞர் சோலச்சி வாசித்து காட்டினார்.


கவிஞர் கீதா அண்மையில் வாசித்த “நிழலற்ற பெருவெளி” என்ற எழுத்தாளர் அர்ஷியாவின் மொழிபெயர்ப்பு நூல் குறித்தும்,”நிசப்தம்” திரைப்படம் குறித்தும் அறிமுகம் செய்தார்.

வரவேற்புரை:கவிஞர் நீலா..

ஒவ்வொருவரையும் அவர் அறிந்த விதத்தினைக்கூறி  வரவேற்ற விதம் அருமை.

Saturday, 25 March 2017

வீதி -௩௭ 37

அன்புடன் அழைக்கின்றோம்

வீ தி கூட்டத்திற்கு கிளம்பிட்டீங்களா ...
இன்று[26.3.17]காலை பத்து மணியளவில் நம்ம புதுகை பேருந்து நிலயத்தில் உள்ள ஆக்ஸ்போர்டு சமையற்கலை கல்லூரியில்....

வரவேற்புரை :கு.ம.திருப்பதி

தலைமை .இரா .ஜெயா

நூல் விமர்சனம் :மீரா .செல்வகுமாரின் "சின்னவள் "-ராசி.பன்னீர் செல்வம்

மகளிர் தின உரை :ரேவதி

சிறப்புரை :நெடுவாசல் போராட்டக்களம் கண்ட இயற்கை உழவர் "ச .வே .காமராசு"


நிகழ்ச்சி தொகுப்பு :நீலா



சின்னவள்-நூல் விமர்சனம்

தாயுமானவனின் "சின்னவள் "கவிஞர் மீரா.செல்வக்குமார் அவர்களின் கவிதை நூல்

காலப்பெருநதியில்...சிறிய காவியமாய் "சின்னவள்" சிரிக்கின்றாள் .

ஒரு அன்பான தந்தைக்கு பாத்திரமான குழந்தை ...தந்தையின் ஸ்பரிசத்தில் உலகை வெல்லத்துடிக்கும்....கவிதையாய் "சின்னவள்"...மகளுக்கே தான் வடித்த உணர்வுகளை நெய்து நூலாக்கி சின்னவளோடு நம்மையும் சிறைப்படுத்தும் வித்தை அருமை..

ஆண்களே மோசம் என்ற குற்றச்சாட்டுகளை பொய்ப்பிக்க சின்னவள் பிறந்துள்ளாள்.

தேவதைகளால் தேடப்படுபவன் -நூல் விமர்சனம்

கவிஞர் தங்கம் மூர்த்திஅவர்களின் "தேவதைகளால் தேடப்படுவன் "நூல் திருமிகு பாரதிகிருஷ்ணகுமார் அவர்களால் அண்மையில் வெளியிடப்பட்டது ....

புதுகை மக்களின் அன்பில் நிறைந்த கவிஞரின் நூலின் தலைப்பே அவரின் தன்மையை உணர்த்துவதாக அமைந்துள்ளது மிகச்சிறப்பு ..

குளிர் இளந்தென்றலின் மணமும்,மென்மையும் .....நம்மை பரவசப்படுத்துவது போல ...மழையில் நனைந்த பூக்களின் தலையாட்டலாக ,மல்லிகையாய் மனம் முகிழ்க்கும் கவிதைகள் .....
                
                                                 "குளிர்ந்த ஒளி
                                       மழையெனப் பொழிந்து
                                         என்னை முழுவதும்
                                           நனைத்திருந்தது

                                                அப்போது
                                             பூமியெங்கும்
                                           பூத்திருந்தன
                                             நிலவுகள் "
நிலா பூக்கும் அதிசயம் இவருக்கு தான் தோன்றும் ...

Thursday, 23 March 2017

காவு கொடுக்கவா வளர்த்தோம் ..

காவு கொடுக்கவா வளர்த்தோம் ..

எத்தனையோ வலிகளில் ஆறுதலாய் இருப்பது குழந்தைகளே ....

என் தோழியின் கவலைக்கு மருந்தாக அவர்களின் குழந்தைகளே இருந்தனர் .வேதனைகளை அவர்களின் வளர்ச்சி கண்டு துடைத்து வாழ்ந்தார் ....

சில மாதங்களுக்கு முன் கடைவீதியில் மகிழ்வாய் ஓடி வந்து கீதா நல்லாருக்கீங்களான்னு கேட்டு கையை பிடித்த போது , நீண்ட நாள் கழித்து அவர் முகத்தில் சிரிப்பை பார்த்தேன் . மனம் நிம்மதியாய் இருந்தது ...

நலமான்னு கேட்டேன் ..நல்லாருக்கேன்..உங்களுக்கு தெரியுமா ரமேஷுக்கு வங்கில வேலைக்கிடைச்சிருக்கு..கரூரில் எஸ்.பி.ஐ.வங்கில பணி செய்கின்றான் என்ற போது அப்பாடான்னு இருந்துச்சு ..

நல்லா படிக்கிற பையன் ...பொறியாளர் படிப்பு முடித்த உடன் வங்கித்தேர்வு எழுதி தேர்வாகியிருந்தான் .இனியாவது மகிழ்வா இருங்கம்மா கஷ்டப்பட்டதுக்கு விடிவு காலம் வந்துடுச்சுன்னு ..மனம் நிறைய சொன்னேன் ..

நல்லவங்க நல்லாருக்க கூடாதுன்னு இருக்கும் போல ...

இன்று அவன் இல்லை.

என்ன சொல்வது திங்களன்று காலை பணிக்கு சென்றவன்..ஏன் செவ்வாய் கிழமை காலை அதிகாலையில் நண்பனிடம் வண்டியை வாங்கிக்கொண்டு புதுக்கோட்டைக்கு வரணும்?. நண்பனிடமும் கூறாமல் ,அம்மாக்கிட்டயும் வரேன்னு சொல்லாமல்....வந்து புதுகை எல்லையில் விபத்துக்குள்ளாகி ஏன் கிடக்கணும் ..?.

தன்  ஆசை மகனின் மரணத்திற்கு காரணம் தெரியாமல் வாழ்வதென்பது ஒரு பெற்றோருக்கு எவ்வளவு வலியைத்தரும் ..

மரணத்திற்கு பலி தரவா குழந்தைகள் ...

அவர்கள் பாதுகாப்பை யோசிக்காமல் ..இப்படி அகலமாக போவதற்கா பிறக்கின்றனர் ..

அதே இடத்தில் இன்று மாலை ஒரு இருபத்து நான்கு வயது வாலிபன் விபத்துக்குள்ளாகி அடையாளம் தெரியாமல் புதுகை மருத்துவமனையில் உள்ளதாக முகநூலில் செய்தி வருகின்றது..

எப்படி பாதுகாப்பாக வண்டி ஓட்டுவதென்பதை இன்னும் கற்று கொடுக்கவில்லையா அல்லது அவர்களின் அலட்சியமே காரணமா ?

தலைக்கவசம் அணிந்திருந்தால் அவர்கள் இருவரும் இன்று உயிருடன் இருந்திருப்பார்கள் ....

பெற்றோர்களை வேதனைக்கடலில் ஆழ்த்தவா பிள்ளைகள் .

...நடைப்பிணமாக இனி அவர்களது வாழ்க்கை ....

Tuesday, 21 March 2017

வியர்வை


சுட்டெரித்த கதிரவனால்
வானத்தில் வியர்வை
மகிழ்வாய் குதிக்க...

சட்டென்று
இடம் மாறியது
என்னுடலில்
பொல்லாத வியர்வை...

Monday, 20 March 2017

வீதி கலை இலக்கியக்களம்-36[19.2.17]

வீதி கலை இலக்கியக்களம்-36

பிப்ரவரி மாத வீதிக்கூட்டம்

மிகத்தாமதமான பதிவிற்கு மன்னிக்கவும்..
 மிகச்சிறப்பாக நடந்தது வீதிக்கூட்டம்...

பிப்ரவரி மாதம் 19.2.17 அன்று அமைப்பாளர்களான பேராசிரியர் சக்திவேல் மற்றும் கவிஞர் சுகுமாரன் ஆகியோரால்அருமையாக நடந்தது..
வரவேற்புரை :கவிஞர் சுகுமாரன்...
தனக்கே உரிய பாணியில் அனைவரையும் அன்புடன் வரவேற்ற விதம் அருமை.

தலைமை:கவிஞர் .முத்துநிலவன்

வீதியின் தோற்றத்திற்கும், வளர்ச்சிக்கும் கவிஞர் முத்துநிலவன் அவர்களின் பங்கு குறிப்பிடத்தக்கது..அவர் இம்மாத வீதியில்  தலைமை ஏற்று ஒரு பண்பாட்டுக்கூட்டமாக வீதி உள்ளது.ஒரு படைப்பு பற்றி நீண்ட நெடிய பாரம்பரிய மிக்க தமிழ் மொழியில், படைப்பாளனின் கடமை கூடுதலாக உள்ளது.வள்ளுவன் கையில் உள்ள எழுத்தாணியும்,தொல்காப்பியனின் தூரிகையும், நம் கையில் உள்ள பொறுப்பு எவ்வளவு முக்கியத்துவம் வாய்ந்தது என்பதைக்கூறுகின்றது...இக்காலக்கல்வி படைப்பாளியை உருவாக்கவில்லை...என்று கூறி தனது சிறப்பானதொரு தலைமை உரையால் வீதிக்கு அணி செய்தார்.

Saturday, 18 March 2017

எந்த மரம் குடை பிடிச்சிட்டுருக்கு?

எந்த மரம் குடை பிடிச்சிட்டுருக்கு?

 இப்படி உரிமையாய் பேசும் உறவுகளைத் தந்த முகநூலிற்கு எனது மனம் நிறைந்த நன்றி...

 பேலியோ டயட்டிற்காக....நமது உள் உறுப்புகளின் காயத்தை சரி செய்ய பசுமஞ்சள் கொழுப்பு உணவுக்குபின் சாப்பிட வேண்டும்...அதனுடன் ஒரு சின்ன வெங்காயம்,எட்டு மிளகு,மூன்று துளசி இலை சேர்த்து சாப்பிடுவதற்கு பசு மஞ்சள் வைத்தியம் என்று பெயர்.. 

இதற்காக சேலத்தில் இயற்கை விவசாயத்திற்காகவே வாழ்கின்ற முகநூல் சகோதரியான @ Aaranya Alliஅவர்களிடம் பேசிய பொழுது ஒரு விவசாயி மகளாக,பூமியின் மீது அவர் கொண்டுள்ள அக்கறை மனதை நெகிழ வைத்தது.. இயற்கையாக வேளாண்மை செய்யும் எண்ணம் வந்த தருணத்தை அவர்கள் கூறிய போழுது எத்தனை பொறுப்பற்று வாழ்கின்றோம் எனத் தோன்றியது.. 

Thursday, 16 March 2017

சே..

ஆறடி நிலம் கூட
ஆற்று மணலாய் கரைந்திடும்..புவியில்

அளவில்லா சொத்துக்குவிப்பு
வாசிக்கவே கூசுமளவு..

நிம்மதியாக உறங்கிட இயலுமோ..
நீதியற்றவர்களால்...

நேரில் முடியாதவர்கள்
மனதிற்குள் காரி....

வருங்கால சந்ததிக்கு...
வறண்ட மண் கூட
சாத்தியமின்றி...
 
சாக்கடை அரசியலில் மூழ்கிடும்
பாரதம்....
 




Wednesday, 15 March 2017

மின்னூல்கள்




 நம்பவே முடியவில்லை புஸ்தகா நிறுவனம் எனது நூல்களை மின்நூலாக வெளியிட்டுள்ளது .கவிஞர் முத்துநிலவன் அண்ணாவின் முயற்சியால் இன்று புதுகை எழுத்தாளர்களின் நூல்கள் அனைத்தும் மின்னுக்குள் வடிவில் ....நன்றி அண்ணாவிற்கு புஸ்தகா நிறுவனத்தினருக்கும் ...



 எனது முதல் கவிதை புத்தகமும்,வளரி சிற்றிதழ் வழங்கிய கவிப்பேராசான் மீரா விருது பெற்றுள்ள புத்தகமுமாகிய "விழிதூவிய விதைகள்" ...மின்னூலாக உங்களுக்காக...

http://www.pustaka.co.in/home/ebook/tamil/vizhi-thooviya-vidhaigal




 எனது வாழ்வின் திருப்பு முனையாக....இளமுனைவர் பட்ட ஆய்வு நூல் கவிஞர் ஜீவபாரதியின் "வேலு நாச்சியார் நாவலில் பெண்ணியச்சிந்தனைகள்" "...எனது முதல் நூலாக 2007 இல்வெளியிடப்பட்ட நூல்..தற்போது மின்னூலாக...நன்றி புஸ்தகா நிறுவனத்திற்கு...
Velu Nachiyar Novelil Penniya Sinthanagal | Tamil eBook | M. Geetha | Pustaka

http://www.pustaka.co.in/home/ebook/tamil/velu-natchiyar-novelil-penniya-sinthanaigal




எனது "ஒரு கோப்பை மனிதம்" கவிதைப் புத்தகம் மின்னூலாக..

http://www.pustaka.co.in/home/ebook/tamil/oru-koppai-manitham


Tuesday, 14 March 2017

இன்னும் எத்தனை காலம்?


குப்பைகள் பொறுக்கிய
கைகளில் புத்தகங்கள்
தவழ்வதை பொறுக்காத
பொறுக்கிகளா .....

குருதி கொதிக்கும் நிலை
குனிந்த முதுகு சற்று
நிமிர்வதை தாங்க முடியாது
கொலை செய்தீர்..

வயல்களில் காய்த்த விரல்கள்
வடுவேறிய கால்கள்
கல்லூரி மிதிப்பதை
கண்கொண்டு சகிக்க முடியாத
கடைமடையர்களே..

மலம் அள்ளவா கைகள்
மதியற்றீரா நீவிர்...

வந்தேறிகளே....
வரம்புமீறி போகின்றீர்....
ஒரு விதை
ஒரு வனத்தின் திறவுகோல்

ஒரு மரணம்
ஓராயிரம் குருதிகள் வெடித்துச்
சிதறும்.....அணுக்கூட்டம்

மூடர்களே.....
முடை நாற்றம் வீசும்
உங்கள் குருதியைக் கழுவிக்கொள்ளுங்கள்...
எங்களின்..........ல்
பாவம் தொலைய.....







Saturday, 11 March 2017

மகளிர் தின உரை-வழக்கறிஞர்கள் சங்கம் அறந்தாங்கி 8.3.2017

மகளிர் தின உரை-வழக்கறிஞர்கள் சங்கம் அறந்தாங்கி

வாதாடுபவர்கள் முன்
சொல்லாடும் கவி நான்
வார்த்தைகளால் வாழ்கின்றோம்
ஆம் ..வார்த்தைகளால்
வானத்தையும் வில்லாக்கும்
வழக்குறைஞர் நீவிர்
தலைகுனியா நீதி வழங்கி
தலைநிமிர்ந்து நடக்கும் நீதிபதிகள்.

 வானவில் குழந்தைகளை
வளப்படுத்தும் ஆசிரியர் நான்.

சமூகத்தை வழக்குகளால்
சந்திக்கும் உங்களிடத்தில்

சமூகத்தை கவிதையால்
சங்கமிப்பவள் வாழ்த்துகின்றேன்
இனிய மகளிர் தின வாழ்த்துகள்.

” மாதர் தம்மை இழிவு செய்யும்
மடமையைக்கொளுத்துவோம்” என்றான் பாரதி..ஆனால் பாரதிக்கே மாதரின் இருப்பை அறிவுறுத்தியவர் சகோதரி நிவேதிதை..அவர்களது சந்திப்பிற்கு பின்னே தான் பாரதியின் பாடல்களில் பெண்ணியச்சிந்தனை அதிகம் கலந்தது என்றால் மறுக்க முடியாது.

இரோம் ஷர்மிளா

இரோம்....
இரும்பு பெண்மணியே
துருப்பிடித்த மனங்கள் உனை
தூக்கி எறிந்துள்ளது, உன்
தியாகம் உணரா மாக்கள்.
பலியாவதையறியா
பலியாடுகள்....

எத்தனை வலி தாங்கினாய்
எதையும் நினைக்கவில்லையே.
இத்தனை துரோகத்தை ஏற்க
இதயத்திற்கு வலிமை வேண்டும்
உன் அருமை பெருமை உணர
காலம் வழி செய்யட்டும்.

Thursday, 9 March 2017

மகளிர் தின விழா 8.3.17

மகளிர் தின விழா

8.3.17 அன்று மகளிர் தின விழாவிற்காக காலையில் எம்.எஸ்.சுவாமிநாதன் ஆராய்ச்சி நிறுவனம் மற்றும் ரோட்டரிநிறுவனம் இணைந்து நடத்திய விழாவில் சிறப்பு விருந்தினராக கலந்து கொள்ள நீலா அழைத்த போது பொதுவாக இலக்கிய கூட்டங்களில் மட்டும் அதிகம் கலந்து கொண்ட எனக்கு விவசாயம் சார்ந்த தொழில் புரியும் பெண்கள் கலந்து கொண்ட விழா புதிய உணர்வைத்தந்தது.மாவட்டத்திட்ட அலுவலர் புதுவாழ்வுத்திட்டம் திருமிகு வசுமதி அவர்களும்,எம்.எஸ்.சுவாமிநாதன் ஆராய்ச்சி நிறுவனத்தைச்சேர்ந்த திருமிகு இராஜ்குமார் அவர்களும் ,திருமிகு பிலால் மற்றும் குயிலி ஆகியோரால் விழா மிகச்சிறப்பாக நடந்தது..அவர்களுக்கு மனம் நிறைந்த வாழ்த்துகளும் நன்றியும்.



8.3.17 மாலையில் மற்றுமொரு அனுபவமாக வழக்கறிஞர்கள் சங்கம் அறந்தாங்கி நடத்திய விழாவில் மாவட்ட குற்றவியல் நீதிபதி,மற்றும் மாவட்ட உரிமையியல் நீதிபதிகள் தலைமையேற்க..சிறப்பு விருந்தினராகக்கலந்து கொண்டு மகளிர் தினவிழாக்குறித்து பேசினேன்.எனக்கு முன் பேசிய வழக்கறிஞர்கள் பெண்களுக்கு சுதந்திரம் வந்துவிட்டதாக அவர்கள் பயன் படுத்திக்கொள்ளவில்லை என்றும் பேசினார்கள்.





.கொஞ்சம் பதட்டம் இருந்தாலும் சொல்லவேண்டிய கருத்தை அவர்கள் ஏற்கும் விதத்தில் கூறிய போது அவர்களால் மறுக்க முடியவில்லை...விழாவை மிகச்சிறப்பாக நடத்திய திருமிகு பிஸ்மில்லா அவர்களுக்கு மனம் நிறைந்த வாழ்த்துகள்.

Monday, 20 February 2017

பெண்ணாய் பிறக்க என்ன கொடுமை செய்தோம்?

இன்னும் எத்தனை நாள்
இந்த கொடுமைகள் நீடிக்கும்.

அண்ணாக்களும், அப்பன்களும்
உறவு மறந்த ஆண்களும்
உள்ளம் சிதைந்த மிருகங்களும்
வளரும் மார்பைக் கசக்கும் கொடுமை
வலிக்கும் வலியை யாரிடம் கூற..

உங்களால் குதறப்பட்டு குருதி வழியும்
உயிர் பிடுங்கும் வலியோடு,
எங்கள் யோனி சிதைக்கும் உரிமை
யார் தந்தார்?

உயிர் கொடுத்து, உயிர் வலிக்க
உயிர் படைக்கும் சக்தி நாங்கள்...

வெறி பிடித்த மிருகத்தின்
முகமூடியறியாமல்
வக்கிரமாய்ச் சாகின்றோம்...

நித்தம் நித்தம் வக்கிரங்களின் ஓலங்கள்
நித்திரையிலும் பயந்து அலறுகின்றோம்.

மெல்ல மலரும் மொட்டுகள்
மேனி கருகி எரிகின்றோம்...

என்ன செய்வதென விழிக்காதீர்
கொடுங்கோலனின் குறி அறுத்து
கொடுமை செய்யும் எண்ணம் அழிப்பீர்...

உங்கள் வீட்டுக்குழந்தை
உயிர் விடாமல் தடுப்பீர்..
 
ஏழாம் வகுப்பு படித்த ஹாசினி


மூன்று வயது நிரம்பிய ரித்திகா


Sunday, 19 February 2017

Two days one night-

Two days one night

புதுக்கோட்டை உலக சினிமா சங்கத்தின் மூலம் இன்று மாலை கந்தர்வன் நூலகத்தில் TWO DAYS ONE NIGHT -என்ற பிரெஞ்ச் படம் திரையிடப்பட்டது.

ஒரு பெண்ணை அவள் பணிபுரியும் நிறுவனம் ஆட்குறைப்பு என்ற பெயரில் பணிநீக்கம் செய்ய உள்ளதாகவும்...அவளுடன் பணிபுரிபவர்கள் கம்பெனி போனஸாக தரும் 1000 ரூபிளை வேண்டாம் என்றால் அதற்கு பதிலாக அவளை பணிக்கு ஏற்பதாக ந்ர்வாகம் கூறுகின்றது.

அவள் குடும்பம் மட்டுமல்ல அவளுடன் பணிபுரிபவர்களும் மிகவும் கடன் சூழ்ந்த வாழ்க்கை வாழ்ந்து கொண்டிருக்கும் சூழ்நிலையில் ...தனது பணியைத்திரும்ப பெற அந்தப்பெண் எல்லோரிடமும் தனக்காக போனஸை விட்டுத்தர கேட்டு தவிக்கும் தவிப்பை மிக யதார்த்தமாக படமாக்கியுள்ளனர்.

அவளுக்காக அவளது கணவனும் இணைந்து தவிப்பது அழகான இல்லறத்துணையாக பரிணமிக்கும் காட்சி.

தனக்காக அவள் போராடுவது பெண்களுக்கு தன்னம்பிக்கை அளிக்க கூடிய ஒன்றாக.

இறுதியில் அனைவரிடமும் பேசி பாதிப்பேர் அவளுக்காக தனது போனசை விட்டுத்தர முன் வருகின்றனர்.

பணி உறுதி என்ற நிலையில் அவளது மேலதிகாரி அவளை அழைத்து கறுப்பின வாலிபரை நீக்கி விட்டு உங்கள் பணியை உறுதி செய்வதாக கூறுகையில் ,கறுப்பின தோழருக்காக தனது பணியை விட்டுக்கொடுத்து, மனப்பூர்வமாக வெளியேறுவது ....மனதில் நிலைத்து நிற்கின்றது.

அனைவரிடமும் கையேந்தி பிச்சை கேட்கும் நிலை வந்துவிட்டதே என அவள் தவிக்கும் தவிப்பு ஆசம்...

எந்தவித பின்னணி இசையுமின்றி மிக யதார்த்தமாக படம் உள்ளது.

தனக்காக அவளே போராடி வெற்றி பெறுவதாக அமைந்துள்ள திரைக்கதையைக்காண்கையில் நமது தமிழ்ச்சினிமாவில் பெண்களின் நிலையை ஒப்பு நோக்காமல் இருக்க முடியவில்லை.

நம்நாட்டில் உயிரோடு வாழ்வதற்கே பெண்கள் போராடும் நிலையில் எங்கே அவள் சுதந்திரமாக தனது பணிக்காக போராட முடியும்.

இயல்பாக பெண்களுக்கு அவர்கள் தரும் மரியாதை பண்பாடுமிக்க நாடு என்று சொல்லிக்கொள்ளும் இந்தியாவில் இல்லை என்பது மறுக்க முடியாத உண்மை.

நம் தமிழ்ச்சினிமா யதார்த்தத்தை படமெடுக்க இன்னும் பலமைல் கடக்க வேண்டும்...

இவ்வாய்ப்பைத்தந்த இளங்கோ சாருக்கு மிக்க நன்றி.
.

Friday, 10 February 2017

என்ன செய்ய போகின்றோம்?

இன்று மாலை 6,7,8 வகுப்பு குழந்தைகளோடு பேசியபோது முதலில் அவர்கள் தயங்கினாலும் பின் இயல்பாக பேசத்துவங்கினர்.

நல்ல தொடுகை ,தீய தொடுகை பற்றி கூறிய போது சில குழந்தைகளின் கண்களில் மிரட்சி தெறிந்தது..அவர்கள் பாதிக்கப்பட்டுள்ளதை உணர முடிந்தது.

சில குழந்தைகள் கூறியதை சீரணிக்க முடியவில்லை..அவர்களைச்சுற்றியுள்ள ஆண்களின் வக்கிரத்தை குழந்தைத்தன்மையுடன் கூறிய பொழுது எச்சரிக்கத்தான் முடிந்தது.

சில குழந்தைகள் அம்மாகிட்ட சொல்ல மாட்டேன் அம்மா உங்ககிட்ட சொல்றோம்,அவங்க அடிப்பாங்க என்ற போது..வீடு அவர்களை நம்ப மறுப்பது எவ்வளவு கொடுமையானது.

நாம பெண்குழந்தைகளிடம் இன்னும் நெருங்க வேண்டும்..அவர்களுக்கு பாதுகாப்பை உறுதி செய்ய வேண்டும்...எப்போது ?
There was an error in this gadget