வைகறை என்ற ஜோசப் பென்சிஹர்

சகோதரர் திருப்பதி, வைகறையைப்பற்றி எழுதக்கேட்டுக்கொண்டதன் பேரில்...
வைகறை என்ற ஜோசப் பென்சிஹர் ------------------------------------------------------------- நீண்ட நெடிய உருவமும்,
மாறாத புன்சிரிப்பும்,
கவிதைகளுடன் கலந்த வாழ்வும்,
யாரையும் புண்படுத்தாத நல்ல உள்ளமும்,கொண்ட வைகறை   திருச்செந்தூருக்கு அருகில் உள்ள தூத்துக்குடி மாவட்டத்தில் உள்ள அடைக்கலாபுரத்தில் 3.3.1979 இல் பிறந்தார்.

ஒரு தம்பி ...மட்டுமே உடன்பிறந்தவர். .

கல்வி
1984-1992 ஆம் ஆண்டுகளில் ஒன்றாம் வகுப்பு முதல் எட்டாம் வகுப்பு வரை, அடைக்கலாபுரம் புனித ஆரோக்கிய அன்னை நடுநிலைப் பள்ளியில் கல்வி பயின்றார். பின்னர் 1992 -1996 ஆம் ஆண்டுகளில் பாளையங்கோட்டையில் உள்ள ஒரு பள்ளியில் 9 முதல் 12 ம் வகுப்பு வரை படித்தார். பின்னர் தூத்துக்குடி மாவட்டம், கோவில்பட்டி அருகில் அமைந்துள்ள வானரமுட்டியில் அமைந்துள்ள ஆசிரியர் பயிற்சி நிறுவனத்தில் (DIET) 1996-1998 கல்வி ஆண்டில் தனது ஆசிரியர் பயிற்சிப் படிப்பை நிறைவு செய்தார். பின்னர் பாளையங்கோட்டையில் இருக்கும் பிரதர்ஸ் யூனியன் கிறிஸ்தவ துறவிகளால் நடத்தப்படும் கிறிஸ்து ராஜா மேல் நிலைப்பள்ளி யில் ஏறத்தாழ பத்து ஆண்டுகள் management staff ஆக பணி புரிந்தார். பின்னர் தூத்துக்குடி நகரில் அமைந்துள்ள St.Mary's higher secondary school (RC.aided) பள்ளியில் முதன் முதலாக அரசுப்பணியில் சேர்ந்து (ஒரு வருடம்) பணியாற்றினார். பின்னர் அவருக்கு சீனியாரிட்டி அடிப்படையில் அரசு பள்ளியில் வேலை கிடைத்ததால், ஏற்கனவே ஒரு வருடமாக பார்த்து வந்த aided school வேலை விட்டு விட்டு தர்மபுரி மாவட்டத்தில் ஊராட்சி ஒன்றிய துவக்க பள்ளியில் 



2009இல்  ”பெரும்பாலை” கிராமத்தில்அரசுப்பள்ளி ஆசிரியர் பணி கிடைத்ததும் அங்கு சில வருடங்கள் பணிபுரிந்தார்.

பின் அவருக்கு 2014இல் புதுகையில்உள்ள நிலையக்கோட்டை பள்ளிக்கு பணிமாறுதல் கிடைத்ததும் மிக மகிழ்வுடன் வந்தார்.

 அவருக்கு ரோஸ்லின் என்ற துணைவியாரும், ஜெய்சன் என்ற 3 வயது குழந்தைகள் மட்டுமே உலகமாக இருந்தது..

 இலக்கியப்பணி
படிக்கும் காலத்திலேயே கவிதை எழுதி ஆசிரியர்களிடம் பாராட்டு பெறுவார். கவிதை மட்டுமின்றி நாடகம், பட்டிமன்றம் விடுமுறை விவிலிய பள்ளி (VBS)யில் தலைமை ஆசிரியர் என பல துறைகளிலும் தனக்கென தனி முத்திரை பதித்தார். அவர் இல்லாமல் அவரது ஊரில் எந்த மேடை நிகழ்ச்சியும் நடைபெற்றது இல்லை. மிகச்சிறந்த வர்ணனையாளர். 

 ஆசிரியப்பயிற்சி படிக்கும் பொழுது ”வளர்பிறை” என்ற கையெழுத்து பத்திரிக்கை நடத்தியுள்ளார்.

 நந்தலாலா என்ற பெயரில் எஸ்.எம்.எஸ் மூலம் கவிதைகளை வெளியிட்டு வந்தவர், பின் அதனை நந்தலாலா.காம் என்ற இணைய இதழாக உருவாக்கி நடத்தி வந்தார்.

சிறந்த மரபுக்கவிதைகளை எழுதியுள்ளார்..

அவரது சிறுகதைகள் பேசப்பட வேண்டியவைகளாக உள்ளன. 


”முழுநிலாமுற்றம்”என்ற பெயரில் புதுகையில் 10 கூட்டங்கள் ஒவ்வொரு மாதமும் பௌர்ணமி அன்று அனைவரும் ஒன்று கூடி இலக்கியம் பேச வைத்தவர்.

 நூல் வெளியீடு

 ஒரிஜினல் தாஜ்மகால் (2008)
 நிலாவை உடைத்த கல் (2012)
ஜன்னல் திறந்தவன் எட்டிப் பார்க்கப்படுகிறான் (2014)ஆகிய பேசக்கூடிய ,ஆளுமை நிறைந்த கவிதை நூல்களை வெளியிட்டுள்ளார்.

மூன்றாவது நூல் முழுதும் தன் மகன் ஜெய்க்குட்டியை கவிதைகளாக வடித்துள்ள சிறந்த தந்தை.
 உறவுகளை நேசிக்கும் மாமனிதர்.எல்லோரையும் மேடையேற்றி ,பாராட்டி ஊக்கப்படுத்தும் மனிதநேயமுள்ளவர்.அதனாலேயே வைகறை தன் தரத்தை இழந்துவிட்டார் என்று நண்பர்கள் மத்தியில் கூறினாலும்..கவலைப்படாது .....அனைவரையும் நேசிக்கும் பண்பாளர்.

புதுகைக்கு வந்த இரண்டாம் மாதமே ”கவிதைகளால் இணைவோம் ”என்ற கூட்டத்தை நடத்தியவர்.

புதுகை கணினித்தமிழ்ச்சங்கம் நடத்திய வலைப்பதிவர் விழா சிறக்க முக்கிய காரணமாய் இருந்தவர்.

 வீதி கலைஇலக்கியக்கூட்டங்களில் புதுமைகளைப்புகுத்தி உலகெங்கும் வீதி கலை இலக்கிய அமைப்பு பேசப்படும் அளவிற்கு பாடுபட்டவர்.

 தரமான கவிதைகளைப்படைக்க, கவிஞர்களுக்கு மே மாதத்தில் பயிற்சி அளிக்க வேண்டும்என்றும்,வெளியூரில் உள்ள கவிஞர்களை புதுகையிலும் ,புதுகையில் உள்ள கவிஞர்களை வெளியூரிலும் அறிமுகம் செய்ய வேண்டும் என்பதை செயல் படுத்திக்காட்டியவர்.

 பத்துவருடங்களாக ஆண்டு விழாவே நடக்காத அவரது பள்ளியில் சென்ற மாதம் சிறப்புடன் ஆண்டு விழா நடக்க காரணமானவர்..

அவரது முயற்சிக்கு அவரது மனைவியின் ஒத்துழைப்பு பாராட்டத்தக்கது. 

நல்ல கணவன்,நல்ல தந்தை,நல்ல ஆசிரியர்,நல்லநண்பர்,சிறந்த கவிஞர்,மனித நேய பண்பாளர்,புத்தகத்திற்கு மட்டுமே செலவு செய்யும் வாசிப்பாளர்.


 கவிதை உலகம் சிறந்த தரமான ஆளுமை நிறைந்த கவிஞரை இழந்துவிட்டோமே எனக்கதறி துடிக்க வைத்துவிட்டு 21.4.16 அன்று, தனது 35 ஆவது வயதில் மறைந்து விட்டார்.

நன்றி அவரது நண்பர் லாரன்ஸ் அவர்களுக்கு.